يعني ايه فلول | Nothing But The Best (We are/do/get)

يعني ايه فلول | Nothing But The Best (We are/do/get).

!

مع اني مش فاهمة ليه فجأة الناس بقت متلخبطة او مستعبطة بس بالنسبة لي الموضوع واضح ومش عام ..الموضوع شخصي جدا

وبالشكل ال”شخصي جدا” دا حسيت اني محتاجة اكتب تعريفي لفلول ومين اللي انا بعتبرهم فلول واللي كتييير منهم كانوا اصدقاء اتحذفوا من حياتي تباعا بعد كل موقف من اللي هذكرهم لاحقا 

مش هحكي في المحكي المجرمين معروفين وزي ماذكرت انا هتكلم بشكل شخصي جدا

1- كل من اتمنى موتنا من يوم 25 يناير ليوم التنحي 

2-كل من هلل وانبسط وشارك في الهجوم على التحرير في يوم الجمل

3- اللي تفوا عليا انا واللي اتقبض علينا سوا يوم 3 فبراير وكانوا عايزين يموتونا عشان احنا”جواسيس” واللي قرر يتحرش بيا وانا ايدي في الكلابشات والعسكر جاريني زي اسرى الحرب واللي قالولنا “بعتي مصر بكام” 

4-كل اللي انبسط كل يوم 9 من كل شهر لما العسكر كانوا بيقتلوا فينا 

5-كل اللي شتمنا في اعتصام يوليو واخد صورتي انا واصحابي واحنا نايمين في عز الحر في الشارع وكتب عليها شراميط التحرير وهو يعرفني وقال على اللي في الاعتصام بياعين دم شهدا 

وعمل مش واخد باله او الكره عماه

6-كل اللي قعد يضحك على هجوم سكان العباسية على المسيرة اللي كانت رايحة وزارة الدفاع وقت ماكان محمد محسن بيموت وعمرو غربية بيتخطف ومالك وحابي متثبتين وهيتقتلوا

7-كل اللي صدق ان علاء سرق الدبابة في ماسبيرو بس عشان يبرر للعسكر واللي قرر ان المسيحيين بيموتوا عشان يعملوا فتنة 

8- كل اللي قال على عصام عطا يستاهل يموت بالتعذيب ماهو بلطجي

9- كل اللي شكك ان عين مالك وعين حرارة وغيرهم راحت في محمد محمود وقعدوا يقولوا انهم بيكذبوا عشان يسخنوا الناس 

10- كل اللي قال على ست البنات ايه اللي وداها هناك وليه مش لابسة هدوم تحت الهدوم 

11- كل اللي نزل يهجم على اعتصام الاتحادية وقال هندبحكم ويستاهلوا يموتوا 

12-واخيرا ..كل اللي نازل يوم 30 وهدفه يرجع النظام القديم اللي هيخلصه من الاخوان والثوار في نفس اللحظة 

 

المذكورين اعلاه اللي ماندموش واكتشفوا جريمتهم في اي لحظة من اللحظات وفاقوا وانحازوا للانسانية على الاقل انا مش هحط ايدي في ايدهم حتى لو في سكينه على رقبتي وهيفضلوا في خانة العدو بالنسبة لي

 

اما اللي عايزين استقرار وعايزين يرجعوا يمشوا جنب الحيط ومش عايزين وجع دماغ وعايزين حياتهم الطبيعية الهادية السابقة وعايزين يخلصوا من كابوس الثورة “في رأيهم” فدول ممكن وصفهم بصفات كتير منها الغباء والجبن والجهل والانانية بس بالتأكيد مش فلول لان ع الاقل كان عندهم قدر من الانسانية 

!!!

 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s